Жиззах давлат педагогика институти 1974 йилда ташкил топган бўлиб, шу йили кутубхона ўз фаолиятини бошлаган. Дастлабки йилларда кутубхона 1789 та китоб фондига эга бўлиб, 1437 та китоб хонга хизмат кўрсатган, кутубхона 4 та бўлимда фаолият олиб борган. 

Ўзбекистон Республикаси Президентининг 2006 йил 20 июндаги “Республика аҳолисини ахборот-кутубхона билан таъминлаш ташкил эиш тўғрисида” ги 381-сонли қарорига мувофиқ Бахмал, Ғаллаорол, Мирзачўл, Арнасой, Фориш туманлари ҳамда Жиззах шаҳар марказий кутубхоналари институт ахборот-ресурс маркази таркибига киритилган эди. 

Лекин, мазкур туман тармоқлари институтдан узоқда жойлашганлиги сабабли уларнинг иш фаолиятини доимий назорат қилиш ва зарур вақтларда сўралган адабиётларни етказиб беришда муаммолар юзага келди. Мазкур муаммолар ечими юзасидан Жиззах вилояти ҳокимлигининг  2018 йил   20 январдаги ҳамда Олий ва ўрта-махсус  таълим вазирлигининг 2018 йил  12 февралдаги №14/1-948 сонли келишувига мувофиқ институт таркибидаги туман тармоқларини ҳар бир туманнинг маданият бўлими тасарруфига ўтказилди.

             Айни пайтда ахборот-ресурс маркази Талабалар турар жойида яшовчи талабалар ва асосий ўқув биносидан узоқда жойлашган факультетлар талабалари учун қулайлик яратиш мақсадида ўз тармоқларини  ташкил этган. Талабалар турар жойида АРМнинг  2 та тармоқ кутубхонаси, факультетлар қошида 3 та тармоқ кутубхонаси фаолият олиб боради. Мазкур тармоқлар етарлича ўқув адабиётлар ва электрон ўқув ресурслари билан таъминланган.  

Ҳозирги кунда ахборот-ресурс марказида 6 та ихтисослашган ўқув заллари мавжуд. Булар қуйидагилар: магистрлар ва илмий тадқиқотчилар учун мўлжалланган ўқув зали, ўқув услубий мажмуалар зали,  бадиий адабиётлар зали, аниқ ва табиий фанларга ихтисослашган ўқув зали, ижтимоий-гуманитар фанларга  ихтисослашган ўқув зали ҳамда хорижий адабиётлар ўқув хонаси. 

Институт ахборот-ресурс марказининг умумий майдони 2960 кв.м. бўлиб, жами ўриндиқлар сони 286 тани ташкил этади. Ахборот-ресурс марказида сўнгги йиллар давомида моддий-техник базани мустаҳкамлаш, китобхонларга  ахборот хизматлари кўрсатишнинг замонавий шаклларини жорий этиш, масофадан туриб  ахборот хизматлари кўрсатиш ишларига алоҳида эътибор қаратилди.