Jizzax davlat pedagogika universiteti axborot-resurs markazida joriy yilning 18 may kuni muallif Shukur Po‘latovning “Ta’lim menejmenti yoxud ta’lim tashkilotini ilmiy-metodik boshqarishga innovatsion yondashuv” nomli o‘quv qo‘llanmasining taqdimotiga bag‘ishlangan tadbir bo‘lib o‘tdi.
Tadbirda muallifning o‘zi ishtirok etib, o‘quv qo‘llanmaning mazmun-mohiyati, ta’lim muassasalari faoliyatini innovatsion boshqarishning nazariy asoslari, ta’lim menejmenti tamoyillar, menejmentning mohiyati, uslubiyati, innovatsion boshqaruv jarayonida rahbarning kasbiy mahorati xususida o‘z fikrlarini bayon qildi. Shuningdek, Ta’lim menejmenti kafedrasi mudiri D.Tursunov so‘zga chiqib, mazkur o‘quv qo‘llanma ta’lim boshqaruvi idoralarida xizmat qilayotgan rahbarlar, nazoratchi va metodistlar, ilmiy izlanuvchilar, pedagogika yo‘nalishidagi oliy ta’lim muassasalari tegishli kurs talabalari va magistlari shuningdek ilmiy tadqiqotchilar uchun mo‘ljallanganligini ta’kidlab, ta’lim muassasasini boshqarishda pedagogik diagnostika, kasbiy mahorat darajalari, hujjatlarni rasmiylashtirish va yuritish, ta’lim muassasasining yillik siklogrammasi kabi mavzular yoritilganligini aytib o‘tdi. Muallif o‘zining ushbu o‘quv qo‘llanmasidan 20 donasini axborot-resurs markaziga sovg‘a sifatida taqdim etdi.
